Lagahöfundar framtíðarinnar

Í gær fékk Valdi, tónlistarstjóri húsbandsins, skemmtilega upphringingu.  Á hinni línunni var Harpa Rut Hilmarsdóttir, ein þeirra sem er í forsvari fyrir List fyrir alla.  

List fyrir alla hefur staðið fyrir lista tengdum verkefnum fyrir grunnskóla á Íslandi síðustu ár.  

List fyrir alla og Bubbi Morthens  tóku höndum saman og buðu unglingum í grunnskólum landsins til þátttöku í nýju íslenskuverkefni. Málæði er ætlað að hvetja ungt fólk til að tjá sig á íslensku í tali og tónum. Skilaboðin eru þau að tungumálið tilheyri okkur öllum –  það megi leika sér með það.  Valnefnd sem stýrt var af Bubba valdi þrjú lög til að frekari vinnslu.   Afraksturinn verður opinberaður á RÚV í viku íslenskunnar 11. – 16. nóvember 2024.

Ronja, Rakel, Íris, Valdís, Freydís og Ísey sömdu lag og sendu inn í keppnina og í gær kom í ljós að lagið þeirra var eitt þeirra þriggja laga sem valið hefur verið til útsetningar.  Því mun hér í næstu viku koma flokkur valinkunna einstaklinga til að vinna með stelpunum að útsetningu lagsins.  Hinu Húsbandinu er einnig boðið að taka þátt í þeirri vinnu en í vetur eru tveir hópar starfandi við skólann.  Þau sem munu heiðra okkur með nærveru sinni í næstu viku eru Vigdís Hafliðadóttir, söng- og sjónvarpskona, Vignir Snær Vigfússon, gítarleikari Írafár ásamt tökuliði frá RÚV.

Við erum ekkert eðlilega stolt af Valda og stelpunum og getum ekki beðið eftir að sjá þau uppskera á næstu vikum.  Til hamingju öll, þið eruð frábærar fyrirmyndir, við erum óendanlega stolt af ykkur og samgleðjumst með ykkur.  Við munum auglýsa vel þegar við vitum hvenær þátturinn verður sýndur á RÚV.