Matsferill

Í grunnskóla Húnaþings vestra leggjum við ríka áherslu á að fylgjast vel með námslegri stöðu og framförum allra nemenda okkar. Liður í því er notkun á Matsferli, sem er rafrænt námsmatskerfi á vegum Miðstöðvar menntunar og skólaþjónustu.

Um Matsferilinn: Matsferill samanstendur af stöðu- og framvinduprófum sem meta færni nemenda í lesskilningi, stærðfræði og lesfimi. Prófin í lesskilningi og stærðfræði eru lögð fyrir á vorönn (í tölvu) en lesfimiprófin eru lögð fyrir þrisvar sinnum yfir skólaárið. Kerfið sýnir bæði hlutfall réttra svara og hvar nemandinn stendur í samanburði við jafnaldra á landsvísu, sem gefur dýrmæta sýn á þróun árangurs milli ára.

Fyrirlögn og eftirfylgni hjá okkur:

• Fyrir alla bekki (4.–10. bekk): Þótt sum prófanna séu aðeins skyldubundin í ákveðnum árgöngum á landsvísu, höfum við tekið þá ákvörðun að leggja prófin fyrir alla bekki frá 4. upp í 10. bekk. Með þessu tryggjum við samfellu og getum fylgst náið með framvindu hvers einasta nemanda jafnt og þétt gegnum skólagönguna.

• Samstarf við stoðteymi: Stoðteymi skólans greinir allar niðurstöður úr matsferlinum jafnóðum. Í nánu samstarfi við umsjónar- og faggreinakennara er farið yfir gögnin til að skipuleggja næstu skref. Komi í ljós þörf á auknum stuðningi, inngripum eða krefjandi áskorunum, er brugðist við í sameiningu til að tryggja að rétt úrræði nýtist réttum nemendum.

Markmið okkar með þátttöku í Matsferli er að skapa hvetjandi námsumhverfi þar sem kennsla og stuðningur miðast ávallt við raunverulega stöðu og þarfir hvers og eins.